ஸ்ரீ "பாம்பன் ஸ்வாமிகள்" அருளிய பகைகடிதல் விளக்கத்துடன்

 ஸ்ரீ     "பாம்பன் ஸ்வாமிகள்" அருளிய பகைகடிதல் 

பாம்பன் சுவாமிகள் பாடல் தொகுப்பில் ஆறாவது மண்டலத்தில் உள்ள “பகை கடிதல்” என்னும் இப்பதிகத்தை பக்தியுடன் உள்ளம் உருக பாட திருமயில் மீது செவ்வேட்பரமனைத் தரிசிப்பர்; பகையை வெல்வர்.”என பாம்பன் சுவாமிகளாலேயே ஆசீர்வதிக்கப்பட்ட பதிகம் இது!

 "மயிலே! நீ இல்லாமல் முருகன் எங்கும் செல்ல மாட்டானாமே! சரி! உன்னையே அழைக்கிறேன்! நீ உடனே என் முருகனைக் கூட்டிக் கொண்டுவா!” என விரும்பி வேண்டிக் கேட்கும் வகையில், சந்தம் கமழத் திகழும் பதிகம் இது!

மூலப்பதிகம்:

திருவளர் சுடருருவே சிவைகர மமருருவே
அருமறை புகழுருவே யறவர்க டொழுமுருவே 

இருடபு மொளியுருவே யெனநினையெனதெதிரே 

குருகுகண் முதன்மயிலே கொணர்தியு னிறைவனையே.

மறைபுக ழிறைமுனரே மறைமுதல் பகருருவே

பொறைமலி யுலகுருவே புனநடை  தருமுருவே 

இறையிள முகவுருவே யெனநினை யெனதெதிரே 

குறைவறு திருமயிலே கொணர்தியு னிறைவனையே.

இதரர்கள் பலர்பொரவே யிவணுறை யெனதெதிரே

மதிரவி பல வெனதேர் வளர்சர ணிடையெனமா 

சதுரொடு வருமயிலே தடவரை யசைவுறவே 

குதிதரு மொருமயிலே கொணர்தியு னிறைவனையே.

பவநடை மனுடர்முனே படருறு மெனதெதிரே

நவமணி நுதலணியேர் நகைபல மிடறணிமால் 

சிவணிய திருமயிலே திடனொடு நொடிவலமே 

குவலயம் வருமயிலே கொணர்தியு னிறைவனையே.

அழகுறு மலர்முகனே யமரர்கள் பணிகுகனே

மழவுரு வுடையவனே மதிநனி பெரியவனே 

இழவில ரிறையவனே யெனநினை யெனதெதிரே 

குழகது மிளிர்மயிலே கொணர்தியு னிறைவனையே.

இணையறு மறுமுகனே யிதசசி மருமகனே

இணரணி புரள்புயனே யெனநினை யெனதெதிரே 

கணபண வரவுரமே கலைவுற வெழுதருமோர் 

குணமுறு மணிமயிலே கொணர்தியு னிறைவனையே.

எளியவ னிறைவகுகா வெனநினை யெனதெதிரே

வெளிநிகழ் திரள்களை மீன் மிளிர்சினை யெனமிடைவான் 

பலபல வெனமினுமா பலசிறை விரிதருநீள் 

குளிர்மணி விழிமயிலே கொணர்தியு னிறைவனையே.

இலகயின் மயின்முருகா வெனநினை யெனதெதிரே

பலபல களமணியே பலபல பதமணியே 

கலகல கலவெனமா கவினொடு வருமயிலே 

குலவிடு சிகைமயிலே கொணர்தியு னிறைவனையே.

இகலறு சிவகுமரா வெனநினை யெனதெதிரே

சுகமுனி வரரெழிலார் சுரர்பலர்  புகழ்செயவே 

தொகுதொகு தொகுவெனவே சுரநடமிடுமயிலே 

குகபதி யமர்மயிலே கொணர்தியு  னிறைவனையே.

கருணைபெய் கனமுகிலே கடமுனி பணிமுதலே

அருணைய னரனெனவே யகநினை யெனதெதிரே 

மருமல ரணிபலவே மருவிடு களமயிலே 

குருபல வவிர்மயிலே கொணர்தியு னிறைவனையே.

       

                                                    விளக்கம்

நன்றி : ஸ்ரீமத் பாம்பன் சுவாமிகள் திருப்பள்ளியெழுச்சி  மன்றம்

திருவளர் சுடருருவே சிவைகரம் அமருருவே

அருமறை புகழுருவே அறவர்கள் தொழுமுருவே 

இருள்தபும் ஒளியுருவே எனநினை எனதெதிரே 

குருகுகன் முதன்மயிலே கொணர்தியுன் இறைவனையே. 

விளக்கம்:

தெய்வத்தன்மையும் அழகும் மிகுகின்ற ஒளியுருவு உடையவனே! பார்வதியின் திருக்கரத்தில் அமரும் அழகனே! அருமையான வேதங்கள் போற்றும் திருவுருவானே! தவசிகள் வணங்கும் தவமேனியனே! (அஞ்ஞான) இருளைப்போக்கும் (ஞான) ஒளி வடிவமுடையானே என்று தியானிக்கும் என் எதிரில் பறவைகட்கெல்லாம் தலையாய மயிலே! உன் நாயகனைக் கொண்டு வருவாயாக!!!!! 

விசேடம்:

 திரு - தெய்வத்தன்மை, பேரழகு முதலிய பல பொருளொரு சொல். அறவர்கள் - முனிவர்களுமாம். முருகவேளை அகத்தியர், நாரதர், பராசர புத்திரர்களான ஆறு முனிவர்களும் தொழுதருள் பெற்றனர். இருள்தபும் ஒளியுரு - புற இருள் நீக்கும் சூரியன் போலாது அக இருளையும் ஓட்டும் ஆற்றலுடைய ஒளியுருவினன் என்க. "ஓவற இமைக்கும் சேண் விளங்கு அவிர் ஒளி" என்பர் நக்கீரர். குருகுகள் - பறவைகள். மயில், முருகவேல் திருவடிகளைத் தாங்கும் தனிச்சிறப்பால் "குருகுகள் முதல்" எனப்பட்டது. இறைவன் - எல்லா உயிர்களிலும் தங்குபவன். மயிலிறை எனவே, மயிலுக்குத் தலைவனான செவ்வேல் என்றபடி.

மறைபுகழ் இறைமுனரே மறைமுதல் பகருருவே 

பொறைமலி யுலகுருவே புனநடை தருமுருவே 

இறையிள முக உருவே எனநினை எனதெதிரே 

குறைவறு திருமயிலே கொணர்தியுன் இறைவனையே. 

விளக்கம்:

வேதங்களால் துதிக்கப்படும் சிவபிரான் திருமுன்பிருந்தே மூல மந்திரப் பொருள் விரித்த குரு வடிவே!! பொறுமை நிறைந்த உலக உருவானவனே! வள்ளியம்மை இருந்த புனத்தில் நடந்த அழகனே! பெருமை மிக்க இளமையான திருமுகமுடையவனே என்று தியானிக்கும் என் எதிரில் எக்குறையினையும் நீக்கும் அழகிய மயிலே! உனது இறைவனைக் கொண்டு வருவாயாக!!!!!

இதரர்கள் பலர்பொரவே இவணுறை எனதெதிரே

மதிரவி பல வென தேர் வளர் சரணிடை எனமா 

சதுரொடு வருமயிலே தடவரை யசைவுறவே 

குதிதரு மொரு மயிலே கொணர்தியுன் இறைவனையே. 

விளக்கம்:

பல கீழ்மக்கள் போரிடும்படி இவ்வுலகில் வாழும் எனக்கெதிரில், புகழப்படும் மிகப்பல் சூரியர் (உதயமோ) என என்னும்படி ஒளிவளரும் திருவடியைத் தாங்கும் இடமென்ன (ஊர்தி என) மிகுந்த திறமோடு வரும் மயிலே! பெரிய மலைகள் அதிரும்படி குதித்துவரும் ஒப்பற்ற மயிலே, உனது பெருமானைக் கொண்டு வந்து அருள்க!!!!!

பவநடை மனுடர்முனே படருறும் எனதெதிரே 

நவமணி நுதல் அணியேர் நகைபல மிடர் அணிமால் 

சிவணிய திருமயிலே திடனொடு நொடிவலமே 

குவலயம் வருமயிலே கொணர்தியுன் இறைவனையே. 

விளக்கம்:

பிறவிக்கேதுவான பாவநெறியொழுகும் மனிதர் முன்னே, இன்புறும் என் எதிரில் நவரத்தினம் பதித்த அணியை நெற்றியிலும், அழகிய வேறு அணிகளைக் கழுத்திலும், அணிந்த பெருமை பொருந்திய திருமயிலே! ஆற்றலோடு உலகத்தையே ஒரு நொடியில் வலமாக வரும் மயிலே! உன் தலைவனைக் கொண்டு வந்தருள்வாயாக!!!!!

அழகுறு மலர் முகனே அமரர்கள்பணி குகனே 

மழவுறு உடையவனே மதிநநி பெரியவனே 

இழவிலர் இறையவனே எனநினை எனதெதிரே 

குழகதுமிளிர் மயிலே கொணர்தியுன் இறைவனையே. 

விளக்கம்:

அழகிய மலர்ச்சியுள்ள முகமுடையவனே!தேவர்கள் வணங்கும் குகப்பெருமானே! நீங்கா இளமைத் திருமேனியனே! எல்லோராலும் மதிக்கப்படும் மிகப் பெரிய அறிஞனே! மரணமிலார் (ஞானியர்) தலைவனே! என்று தியானிக்கும் என் முன்னே இளமை விளங்க நிற்கும் மயிலே உன் இறைவனைக் கொண்டு வந்து அருள்க!!!!!

இணையறும் அறுமுகனே இதசசி மருமகனே

இணரணி புரள்புயனே எனநினை எனதெதிரே 

கணபண வரவுரமே கலைவுற எழுதருமோர் 

குணமுறு மணிமயிலே கொணர்தியுன் இறைவனையே. 

விளக்கம்:

மற்றொப்பாரில்லாத அறுமுகனே! இந்திராணி அன்பு கொள்ளும் மருமகனே! கொத்தான மலர் மாலை புரளும் திருத்தோளனே என்று தியானிக்கும் என் எதிரில் கூட்டமான படங்களையுடைய (சேடன்) பாம்பின் வன்மை குன்றும்படி எழும் ஒப்பற்ற (அருட்) குணமுடைய மரகத மயிலே உன் இறைவனைக் கொண்டு வந்தருள்வாயாக!!!!!

எளிய என் இறைவ குகா எனநினை எனதெதிரே 

வெளிநிகழ் திரள்களைமீன் மிளிர்சினையென மிடைவான் 

பளபள எனமினுமா பலசிறை விரிதருநீள் 

குளிர்மணி விழிமயிலே கொணர்தியுன் இறைவனையே. 

விளக்கம்:

ஏழையாகிய அடியேனது இறைவா! குகா! என்று தியானிக்கும் என் எதிரில் வானவெளியில் சஞ்சரிக்கும் கூட்டங்களாகிய விண்மீன்களை, அழகிய முட்டைகளைப் போல ஒடுங்கிப் பளபளவென்று மின்னுமாறு பல இறக்கையை (தோகையை) விரிக்கும் நீண்ட குளிர்ந்த மணிபோலும் விழிபடைத்த மயிலே! உன் இறைவனைக் கொண்டு வந்தருள்வாயாக!!!!!

இலகயில் மயில்முருகா எனநினை எனதெதிரே 

பலபல களமணியே பலபல பதமணியே 

கலகல கல எனமா கவினொடுவருமயிலே 

குலவிடுசிகைமயிலே கொணர்தியுன் இறைவனையே. 

விளக்கம்:

மேலே விளங்கு மயூர (வாகன) முருக எனத் தியானிக்கும் என் எதிரில் கழுத்தணிகள் பலவும், கலகலவென ஒலிக்கும்படி அழகாய் வரும் மயிலே! விளங்கும் கொண்டையுள்ள மயிலே! உன் இறைவனைக் கொண்டு வந்தருள்வாயாக!!!!!

இகலறு சிவகுமரா எனநினை எனதெதிரே 

சுகமுனிவரர் எழிலார் சுரர்பலர் புகழ் செயவே 

தொகுதொகு தொகு எனவே சுரநட மிடுமயிலே 

குகபதி அமர் மயிலே கொணர்தியுன் இறைவனையே. 

விளக்கம்:

சிவகுமார! என் பகையை ஒழித்தருள்க என்று தியானிக்கும் என் எதிரில் பேரின்ப நிலை கைவந்த முனிவர்களும் அழகிய தேவர்கள் பலரும் துதிக்கவும் தொகுதொகு என்ற தாளத்துடன் தேவ நடனம் செய்யும் மயிலே! குகப்பரமன் வீற்றிருக்கும் மயிலே! உன் இறைவனைக் கொண்டு வந்தருள்வாயாக!!!!!

கருணைபெய் கனமுகிலே கடமுனி பணிமுதலே 

அருண் அயன் அரன் எனவே அகநினை எனதெதிரே 

மருமலர் அணிபலவே மருவிடு களமயிலே 

குருபல வவிர்மயிலே கொணர்தியுன் இறைவனையே. 

விளக்கம்:

அருள்மழை பொழியும் கருணை மேகமே! கும்பமுனி (அகத்தியர்) வணங்கும் முதல்வனே! அருணகிரி (யை ஆண்டருள்) அறுமுகச் சிவனே என்றெல்லாம் உள்ளத்தில் தியானிக்கும் என் எதிரில் வாசமிக்க மாலை அணிந்த கழுத்தையுடைய மயிலே! மேன்மைகள் பல விளங்கு மயிலே! உன் இறைவனைக் கொண்டு வந்தருள்வாயாக!!!!! 

விசேடம்:

பாம்பனடிகள் பிரப்பன் வலசைப்பெருந்தலத்தில் 35 நாட்கள் நிட்டை கூடியபோது காளைக் குமரேசன் அவர் திருமுன் அகத்தியர், அருணகிரி என்ற இரு முனிவர்களுடன் காட்சி அளித்தான். இப்பாட்டில் அந்த இரு முனிவர்களையும் ஒருசேர அமைத்திருப்பது விசேடமாம். சுவாமிகள் பாடல்கள் சிலவற்றில் தான் இரு முனிவர் திருநாமங்களும் ஒரே பாட்டில் வரும். எனவே, இப்பாடலில் தாம் பெற்ற உபதேச நினைவும் நிழலாடக் காணலாம். இதில் பிணி நீக்கும் மருத்துவக் கலைஞர் அகத்தியரும் அருள் நோக்குக்கு உதவும் அருணகிரியாரும் பகை நீக்க அருளும் மயூரநாதனும் வருவது உணர்ந்து மகிழத்தக்கது.

For english verses and explanation  http://www.kanchiforum.org/forum/viewtopic.php?t=63&postdays=0&postorder=.&start=3100

விரைவில் திருமணம் நிகழ- திருப்புகழ் விறன்மாறன் ஐந்து!

                                                               ஓம்

       இன்று youtube -ல் ஸ்ரீ ஞான ஸ்கந்த மூர்த்தியின் ஜீவ நாடியில் முருகப்பெருமான் உரைத்தபடி கந்த சஷ்டியன்று  ஸ்ரீஸ்கந்த உபாசகர் சுவாமிகள் அடியார்களுடன் செய்த திருப்புகழ் வேள்வி கண்டேன். விறல்மாறன் ஐந்தில் இருந்து கடைசி பாடலை அற்புதமாக பாடி செய்த யாகத்தின் சிறிய video. இனிமையான ராகத்தினால் உடனே மனதில் இருத்திக் கொள்ள  முடிகிறது. அதன்  video link


  https://youtu.be/8rTJY4LNwps

இதை தினமும் 6 முறை சொல்லிவர, திருமணம் ஆகாதவர்க்கு விரைவில் திருமணம் நிகழும்... ! இது வாரியார் வாக்கு! இனி பாடல்!

விறல்மாரன் ஐந்து மலர்வாளி சிந்த
மிகவானில் இந்து வெயில்காய
மிதவாடை வந்து கழல்போல ஒன்ற
வினைமாதர் தந்தம் வசைகூற

குறவாணர் குன்றில் உறைபேதை கொண்ட
கொடிதான துன்ப மயல்தீர
குளிர்மாலை யின்கண் அணிமாலை தந்து
குறைதீர வந்து குறுகாயோ

மறிமான் உகந்த இறையோன் மகிழ்ந்து
வழிபாடு தந்த மதிபாளா
மலைமாவு சிந்த அலைவேலை அஞ்ச
வடிவேல் அறிந்த அதிதீரா

அறிவால் அறிந்துஉன் இருதாள் இறைஞ்சும்
அடியார் இடைஞ்சல் களைவோனே
அழகான செம்பொன் மயில்மேல் அமர்ந்து
அலைவாய் உகந்த பெருமாளே!

பொருள்:

[பின்பாதி பார்த்து, பிறகு முன்பாதி!]

"மறிமானுகந்த இறையோன்"

தவங்கள் செய்து வலிமையடைந்து பணிவினை மறந்து தருக்குடன் அலைந்த தாருகவனத்தின் முனிவர்கூட்டச் செருக்கினை அடக்க சிவபெருமானும் அழகியவுருவில் அவர்முன் நடக்க,
 மையலில் மயங்கிய முனிவர் பெண்டிர் அழகிய தமிழ்மகன் பின்னே நடக்க ஆத்திரமுற்ற முனிவர் கூட்டம்
அழகனை அழிக்க யாகங்கள் செய்ய
அதனில் கிளம்பிய சிறுமான் வடிவை
அம்பல வாணன் மீதே ஏவ
அன்புடன் சிரித்து அப்புள்ளிமானை
தன்னிரு விரலால் தயவுடன் எடுத்து
கரங்களில் சூடிய கயிலைப் பெம்மான்

"மகிழ்ந்து வழிபாடு தந்த"

செருக்கினால் குமரனைப் பணியாதொழித்த பிரமனை அழைத்து மூலப்பொருளாம் பிரணவத்தொலியின் பொருள்தனைக் கேட்டு
அதனை அறியா திகைத்த நான்முகன் தலையினில் குட்டி சிறையினில் தள்ளி சிருட்டித்தொழிலைத் தானே செய்து க்ந்தவெற்பினில் கம்பீரமாக
கந்தக்கடவுளும் அமர்ந்திட்ட வேளையில், கண்நுதற்கடவுள் குமரனை அழைத்து பிரமனைச் சிறைவிடப் பரிவுடன் சொல்ல,
ஐயனின் சொல்லை மகிழ்வுடன் ஏற்று

பிரமனை விடுத்து, புத்திகள் சொல்லி
தந்தையுடனே தனித்திருக்கும் காலை,
பிரணவப்பொருளைத் தனக்கும் சொல்ல
அப்பனும் வேண்டிட சுப்பனும் மிடுக்காய்
இடம்,பொருள், ஏவல் அறிந்து
கேட்டலும் சொல்லலும் நிகழ்ந்திடல் வேண்டும்
எனவே உரைக்க, அதனின் தத்துவம்,
சீடன் பணிவின் திறனை இந்த
உலகுக்குணர்த்த, அருட்பெரும்ஜோதி
தணிகை சென்று கண்களை மூடி
ஒரு கணப்பொழுது தவமுமியற்ற
[தணிகை மலைக்கு இதனால் "கணிக வெற்பு" என்னும் பெயரும் இதனால் வந்தது!]
சுப்பிரமணியன் அவர்முன் தோன்ற, ஆலவாய் அண்ணல் வடதிசை நின்று
குருவின் முன்னே பணிவுடன் வணங்கி மூலப்பொருளின் பொருளுரை கேட்டார். ஐம்முகக்கடவுள் அறுமுகக்கடவுளின்    சீடனாய் இருந்து குருவிடம் கேட்டல் எப்படி என்பதைப் பாருக்குணர்த்திய,
"மதிபாளா"   - ஞான வடிவினரே!

"மலை மாவு சிந்த அலைவேலை அஞ்ச
வடிவேல் எறிந்த"

கெடுமனங்கொண்ட கொடுங்கோலரக்கன் சூரன் என்பான் சிவனை வணங்கிப் பலவரம் பெற்று தம்பியர் துணையுடன் தேவர் மானிடர் முனிவரை வருத்தி ஆட்சி செய்யும் வேளைதன்னில், முனிவரும் தேவரும் இறைவனை துதிக்க ஐயனும் அவர்மேல் கருணை கொண்டு
நெற்றிக்கண்ணில் தீப்பொறி கிளப்பி ஆறுமுகனாம் ஓருரு உதித்தனன்!

சக்திவேற் படையைத் தாயவள் அளிக்க அதனைக் கொண்டு கிரௌஞ்சமலை பிளந்து தம்பியரைப் போர்க்களத்தில் வென்று
சூரனைப் போரில் பொருதிய வேளை அண்டரும் விண்டரும் நடுங்கிடும் வடிவில் மாமரமாகி சூரன் நின்றனன்.மாமர அசைவினில் அண்டம் நடுங்க
அதனுடன் சேர்ந்து அகிலமும் ஒடுங்க அதனைக் கண்ட செந்தில்வேலோன்
வேற்படைவிடுத்து 'உடலைப் பிளந்து வருகுதி!' என்று ஆணை பிறப்ப,

சங்கார வேலும் காற்றினைக் கிழித்து, ஒளியினைக் கிழித்து, விண்ணினைக் கிழித்து தீச்சுடர் பரப்பி நிலத்தில் நிமிர்ந்த மராமரம் தன்னை கூறாய்ப் பிளக்கும் "அதிதீரா" -வீரச்செயல் புரிந்திட்ட மாவீரனே!

"அறிவால் அறிந்து இருதாள் இறைஞ்சும்
அடியார் இடைஞ்சல் களைவோனே"

பாசம் என்னும் ஒருபேய் வாட்டும் பசுவெனும் மறுபேய் இறைவனை மறைக்கும். இவ்விரு மாயை இரண்டையும் ஒழித்து மெய்யறிவாலே இறையை உணர்ந்து

நீயே சரணம் எனும் நினைவாலே
கந்தனின் திருத்தாள் மலரடி பணிந்து
வேண்டும் அன்பர்கள் வாழ்வினில் தொடரும்
இடர்களை நொடியில் அகற்றிடும் தலைவா!

"அழகான செம்பொன் மயில் மேல் அமர்ந்து
அலைவாய் உகந்த பெருமாளே!"

அழகே உருவாய் செம்பொன் நிறமாய்
திகழும் மயிலின் மேலே அமர்ந்து
செந்தூர் என்னும் சீரலைவாயில்
மகிழ்வுடன் அருளும் பெருமைக்குரியோனே!

"விறல்மாரன் ஐந்து மலர் வாளி சிந்த"

இவனது கணையால் மயங்குவர் கோடி. எவரையும் வீழ்த்திடும் காமக்கணையோன் முனிவருமிவனது கணை பிழையாரே. தேவரும் கெட்டே மதியழிந்தொழிந்தார் பிரமனும் மாலுமே தப்பியதில்லை
எனவே இவனே விறல்மாரனாவான்! அவனே அழகிய மன்மதன் என்பான்!
அவனது கையில் வில்லொன்றுண்டு அவன் தொடு கணையோ ஓரைந்தாகும்!

தாமரைக் கணையால் உன்மத்தம் பிறக்கும்
மாவின் கணையால் காதல் விளையும்
அசோகக் கணையால் கூடுதல் நிகழும்
முல்லைக் கணையால் விரகம் விளையும்
நீலக் கணையால் ஈர்த்தல் நிகழும்!


இவ்வைந்து கணைகளும் ஒருங்கே செலுத்தி மாறன் கணைகள் என்னை வருத்த,

"மிகவானில் இந்து வெயில் காய"
[இதனை "வானில் இந்து வெயில் மிக காய" எனப் படிக்கவும்]

சந்திரன் கணைகள் காதலைக் கூட்டும் வானில் வீசும் சந்திரக் கணைகள்
பகலில் கொளுத்திடும் வெயில் போல் காய்ந்திட மிகவே துன்பம் காதலில் வருத்த,

"மித வாடை வந்து தழல் போல ஒன்ற"

குளிரும் கிரணம் சுடுவது என்றால் வீசும் தென்றலும் வெந்திடுமன்றோ!
மெல்லிய தென்றல் வீசுதல் கூட நெருப்பினைப் போலே சுடுவது போல,

"விலைமாதர் தந்தம் வசை கூற'
வினைவசம் தம்மை இழந்திட்ட மகளிர் மனம்போன வண்ணம் சுடுமொழி கூறி வதை செய்திடவும்,

"குறவாணர் குன்றில் உறை பேதை கொண்ட
கொடிதான துன்ப மயல் தீர"

சீவனென்னும் ஆன்மா ஐம்புலனாம் வேடுவரின் ஆளுகையில் அகப்பட்டு உடலென்னும் மலைக்குள்ளே உனைச் சேரும் வழியின்றி உழலுவதைப் பார்க்கிலையோ! பரமாத்மா உடன் சேரும் நாளைத்தான் ஜீவாத்மா
வெகுநாளாய்க் காத்திருந்து விருப்புடனே நாடுதம்மா! ஐம்புலனும் வேடுவராய் அலைக்கழித்து கொடுமைசெய மலைநடுவே பதுங்கியிரும் பறவை படும் துயர் போல ஜீவாத்மா மயக்குற்ற துயர் நீங்கி சுகம் விளைய,

"குளிர்மாலையின்கண் அணிமாலை தந்து
குறைதீர வந்து குறுகாயோ"

குளிர் பரவும் மாலைநேர வேலையதில் நின் மார்பில் சூடிநிற்கும் மணமாலை தனைத் தந்து என் துயர் தீரும் நிலைதந்து இவண் வந்து
எனைச் சேர்த்து அணைய மாட்டீரோ, குமரவேளே!!!

அலைவாய்- திருச்செந்தூர்.

பொருளுக்கு நன்றி- VSK.

பிருகு மகரிஷி அருள் நிலையத்தில் இராமதேவர் பூசை மற்றும் விளக்கு பூசை 20-3-16

                                                                      ஓம்
 POOJA FOR RAMADEVAR AND MUPPERUM DEVIYAR AT  BRIGHU MAHARISHI       ARULNILAYAM, MARUDERI
   
        நேற்று பங்குனி 7ம் தேதி வளர்பிறை பிரதோஷம், மருதேரி பிருகு மகரிஷி அருள் நிலையத்தில் நடைபெற்ற  இராமதேவர் பூசை மற்றும் விளக்கு பூசையில் கலந்து கொள்ளும் வாய்ப்பு அமைந்தது. குடிலின் மஹிமை, சித்தர்களின் வரவு பற்றியும் பிருகு மகரிஷி சன்மார்க்க சங்கத்தவரான திரு. சீனிவாசன் அவர்கள் அருமையாக விளக்கினார். மும்மூர்த்திகளின் ஆசி பெற்ற பின்னரே ஒரு தலம் சித்தர்கள் வீற்றிருந்து அருள்பாலிக்கும் தகுதி பெறும் என்றார்.    சித்தர்கள் ஒவ்வொருவராக ஐக்கியமாகும் இப்புண்ணிய தலத்தின் பெருமையை  மேலும் அருமையாக விளக்கினார். அதைக் கேட்க கேட்க மிகுந்த பரவசம் அடைந்தோம். அதே பரவச உணர்வுடன் சித்தர்களின் ஆசியுடனும் இத்தலப் பெருமைகளை பகர்கின்றேன்.

       இவ்விடத்தில் இருக்கும் அகோர வீரபத்திரர் இத்தலம் பிருகு மகரிஷி திருப்பாதம் பட்ட தலம் எனவும் அவர் இங்கு வீற்றிருந்து அருள்பாலிப்பார் என வாக்குரைத்துள்ளார். பின்னர் திருவொற்றியூர் ஸ்ரீ பிருகு மகரிஷி நாடி நிலைய அருள்வாக்கில், பிருகு மகரிஷி இத்தலத்தில் எவை எவை எப்படி அமைய வேண்டும் எனக் கணித்துக் கொடுத்துள்ளார். அவ்வாறு அமையப் பெற்ற அத்தல சிறப்புகளை இப்படங்கள் விளக்கும்.

       அருள் நிலைய தலைவாசலில் நுழைந்தவுடன்   நேராக, சற்றுத் தொலைவில், ஒரு கிணறு. அருகிலேயே பல நூறடி போர் போட்டு நீர் எடுக்கின்றனர். ஆனால் பிருகு மகரிஷி குறிப்பிட்ட இடத்தில் கிணறு

                                                         

தோண்டியதால் சில அடிகளிலே நீர் ஊற்றெடுத்தது. அருள்வாக்கின்படி கிணற்றின் வலப்புறத்தில் நந்தி தேவரும் மறுபுறத்தில் அன்னைக் காமதேனுவும் அமைத்துள்ளார்கள். இங்கு வரும் அனைவரும்  முதலில் இக்கிணற்று நீரில் கை, கால்கள், முகம், கழுத்து கழுவி பின்னர் நந்தி தேவரையும் காமதேனுவையும் வழிபட்டு பின்னர் அருள் நிலையம் செல்ல வேண்டும்.

கிணற்றருகிலிருந்து எடுத்த அருள் நிலையப் படம்

 4 அழகியத் தூண்களுடன் அருள் நிலைய வாயில்

       நேற்று பிருகு மகரிஷி அருள்வாக்கின்படி, வரும் ஆண்-பெண் பக்தர்களை சிவ-சக்தியாகக் கருதி, பாதங்களை நந்தியாகக் கருதி மஞ்சள் நீரால் பிருகு மகரிஷி சன்மார்க்கத்தினர் பாதபூசை செய்த பின்னர்  பூசைக்கு அனுப்பினர். இப்பூசை பற்றி வந்த அருள்வாக்கு:

பிருகு மகரிஷியின் சீவ வாக்கு 

தான்முறையே சித்தர்கள் ஆசி வேண்டி

நுட்பமாய் கயல்திங்கள் ஆதி வாரம்
நிச்சயித்த ஆயில்ய மகத்தின் சந்தி  

To attain the blessings of Siddha per principles
in the month of panguni on first sunday (20th March)
as destined in the time when ayilyam and Magam starmeets

மகத்துவமாய் மலைகடவுள் கூடல் நாதன் மொழிந்த விதம் சுந்தரானந்தன் தொடர்ச்சியாக
உகந்ததொரு பூசைவிழா இராமதேவருக்கு
ஓர்மையுடன் இதுகாலம் வேலோன் தனக்கும்

with greatness the mountain god koodal naadhan (koodal = Madurai)
in continuation to siddhar Sundaranandhan
the time is right for the puja of Ramadevar
with oneness time to worship, the Lord of Spear/Vel (Lord Muruga)

தனக்குரிய திணை உணவும் ஈய நன்மை
தானுரைத்த மன்மதவாம் ஆண்டு இறுதி
ஊனமிலா திருமகளை முப்பெரும் தேவியரை
உன்னதமாய் போற்றுவிதம் திருவிளக்கேற்றி பூசை கொள்வீர்

his favourite food Thinai (Millet) will be good to serve

to say before the end of this tamil year (Manmadha aandu)

the flawless Mahalakshmi the three divine devi (Ambal)

Offer Obeisance through Thiruvilakku pooja (5 faced lamp)

பூசைபலன் மங்கலங்கள் பெரும் பொருட்டு

பிசகில்லா அன்னையர்கள் ரிஷி பத்னிகள்
இசைந்து ஆசிபெரும்பொருட்டு போற்றி செய்வீர்
இக்காலம் சக்தியவள் ஆசி எல்லாம்

The Pooja to obtain all blessings and Mangalam
The great mothers the rishi pathni(s)
To make them happy and get their blessing by adoring
and get the blessing of Shakthi during this period

     அருள்வாக்கின்படி அன்னதானத்துடன் தினைப்பாயாசம் வழங்கினர். பச்சை நிறத்தில் இனிப்பான மருந்தும் வழங்கினர். மேலே அருள் நிலைய வாயில் படத்தில் உள்ள சேரில் கண்ணாடிக் குடுவையில் மருந்துள்ளதைக் காணலாம்.
மாடியில் உள்ள வழிபாட்டுக் கூடம் ஏற ஒரு வழியும் இறங்க ஒரு வழியும் உள்ளது.
     ஒருமுறை குருபூசையில் வாயுமைந்தனாகவும், மற்றொரு முறை கிளியாகவும் வந்து காட்சிக்கொடுத்து பின்னர் அதிசயத்தக்க விதமாக மறைந்துள்ளார்.
     பிருகு மகரிஷி தன்னை ஜோதி வடிவில் வழிபட பணித்துள்ளார். அவ்வகண்ட ஜோதியை சற்று நேரம் உற்றப் பார்த்துப் பின் தியானித்தல் நன்று. இவ்வகண்ட ஜோதியில் இதுவரை ஐக்கியமான சித்தர்கள்:

1. அகத்திய மகரிஷி
2. பிருகு  மகரிஷி
3. நந்தி தேவர்
4. சிவவாக்கியர்
5. சுகப்பிரம்ம மகரிஷி
6. சுந்தரானந்தர்
7. இராமதேவர்

      பிருகு  மகரிஷி ஜீவவாக்கின்படி  நேற்று இராமதேவர் இவ்வகண்ட ஜோதியில் ஆயில்ய-மக நட்சத்திர சந்தியில்  ஐக்கியமாவதால் இராமதேவருக்கும் சித்தர்களின் குருவாம் திருமுருகப்பெருமானுக்கும், சித்தர்கள் போற்றும் மனோன்மணி என்றும் பாலா திரிபுரசுந்தரி என்றும் போற்றப்படும் வாலைத் தெய்வத்திற்கும் மிகச் சிறப்பாக பூசை நடந்தது.

ஞான வேல் மற்றும் அகண்ட ஜோதி

     நேற்று  முப்பெரும் தேவியரின் ஆற்றல்களும் இவ்வருள் நிலையத்தில் ஐக்கியமாகியுள்ளது. அவர்களை வரவேற்று மகிழ்விக்கும் விதமாக 51 விளக்கு பூசை ஞாயிறு மக நட்சத்திரத்தில் மாலையில் நந்திகாலமான பிரதோஷ நேரத்தில் 4.30 மணிமுதல் 7மணி வரை நடைப்பெற்றது. அனைத்து பூசைகளும் அழகுத் தமிழில் அமைந்தது.
              

. பிருகு  மகரிஷி, வாலை- பாலா திரிபுரசுந்தரி மற்றும் வேலும் சூலமும்

இத்தலம் மறைமலை நகரை அடுத்து வரும் மல்ரோசாபுரத்திலிருந்து சுமார் 8கி.மீ தொலைவில் மருதேரி பேருந்து நிலையம் மிக அருகே உள்ளது. சொந்த வாஹனத்தில் செல்வது உத்தமம்.